Paj Huam Tu Siab Khwv Noj Khwv Haus Nyob Kev Deb


lam los sau zaj lus paj huam,
mus cuam tshuam kev neej yav tas,
neeg lam kas zoo li yus no,
tu siab nrho tsis paub hais cas,
pias txog mas tu siab ua luaj,
txawm tsis quaj los kua muag poob,
hmoob os hmoob nej puas yuav paub,
ntshe tsis to taub txog peb lub neej.

muab xav mas yus kuj muaj hmoo,
ntau lub xyoo kawm txawj kawm ntse,
muaj koob npe tias neeg paub tab,
mus raws kab li teb chaws vam,
luag tej tham txog yeej qhuas ntxiag,
zoo tiag tiag os hmoob tej tub,
yam lub hnub ya ci ntsuab ntug,
lub neej tus zoo lawm tiag tiag.

qhov tseeb mas nej paub tsis txhua,
tsis xav ua lub neej ntxiv mus,
yus ib tug nyob khuam siab nruav,
nrog mab suav tsis muaj tus hlub,
maub kev dub pem toj nram taug,
mus khuj khaus lub zog ntaug tas,
lub cev mas laus lawm sis rawv,
ntuj os lawv hmoob ntxhais nkauj xwb.

nyob kev deb nco tej txheeb ze,
tias sis ntshe ntev ntev tsis ntsib,
lus qab zib nws twb pib tsuag,
noj ib pluag tsis paub sib hu,
txoj kev du twb rov tuaj nroj,
mus taug zoj yuav dhau tsis taus,
ib ob zaug ntshe yuav tso tseg,
plam ntawm tes lawm os hmoob e.

vim ua neej khwv noj khwv haus,
thiaj tau taug txoj kev deb no,
yeej tseem nco yus tej qub hmoob,
nyob pem roob sab ntuj nraum ub,
hmoov tsis tsub lub ntuj tsis kam,
thiaj tau plam tas kev nkauj nraug,
thiaj li xaus ua tu siab ntsho,
txog hnub no mam hnov qab mus.

tsis paub hais txoj hmoov li cas,
yav neej tas zoo phem sib xyaws,
hais tsis ntxaws thiab piav tsis txhua,
lam sau ua zaj lus paj huam,
coj los thuam txoj kev ntxhov siab,
lwj sis niab hauv ntiaj teb no,
rov txhim kho nplooj siab daim plaws,
ntuj os lawv seb puas yuav zoo.

mam tsis nroo rau ub rau no,
sau siab hlo los pib lub neej,
seb puas tsheej cuab mus nce yim,
thiaj tsis chim lub laj xeeb os,
hais txog tog seev seev tsis taus,
ces cia xaus li no xwb nawb,
ua siab dawb mus lawm nram ntej,
hmoob os nej peb mam ntsib duab.

Xab Lauj 28 0 0 2023-07-28